Fjölskyldan á fjallið

Fjölskyldan á fjallið er landsverkefni UMFÍ, og er liður í verkefninu Göngum um Ísland. Settir eru upp póstkassar með gestabókum á rúmlega 20 fjöll víðsvegar um landið. Flest þessara fjalla eiga það sameiginlegt að vera tiltölulega létt að ganga á. Markmiðið er að fá fjölskyldur í létta fjallgönguferð og stuðla þannig að aukinni samveru, útivist og um leið líkamsrækt innan fjölskyldunnar.

Göngugarpar eru hvattir til að skrifa nöfn sín í gestabækurnar á fjöllum. Á hverju hausti er dregið úr hópi þátttakenda og hljóta hinir heppnu sérstök útivistarverðlaun.

umfi_Grms_2umfi_Grms_2

Um 12.000 manns höfðu skrifað nöfn sín í gestabækurnar fyrstu tvö ár verkefnisins. Sumarið 2003 gekk 63 ára gömul kona á 18 fjöll af 22 í verkefninu. Fjölmargir gengu á sama fjallið mörgum sinnum
Sumarið 2009 gekk 92 ára gömul kona 44 sinnum á Hvolsfjall. Er þetta nýtt met í fjölda gönguferða hjá HSK.

 

Upplýsingar um fjöllin í verkefninu má finna á gagnvirku landakorti á ganga.is, undir gönguleiðir, fjölskyldan á fjallið

  

Ganga fyrir börn

Allir vita að hreyfing er mikilvæg bæði fyrir andlegt og líkamlegt atgervi ekki síður fyrir börn en fullorðna. Mikilvægt er að hvetja börnin til að hugsa um heilsu og hreyfingu ekki síst nú í því kyrrsetuþjóðfélagi sem við lifum í.

Fátt finnst börnunum skemmtilegra en þegar foreldrarnir taka þátt og hreyfa sig líka.

Ganga er heilsusamleg og skemmtileg afþreying fyrir alla fjölskylduna.

Börnum þykir yfirleitt gaman að hreyfa sig en oftast þarf að vera einhver leikur fólginn í hreyfingunni. Mikilvægt er því að gera gönguna spennandi og ævintýralega og aðlaga hana sem mest að áhuga og getu yngstu þátttakendanna til að virkja þau og fá þau til að vilja fara aftur og aftur.

Ábendingar sem gott er að hafa í huga:

  • Fyrst þarf að vekja áhugann. Gott er að gera það með því að tengja gönguna einhverju áhugaverðu.
  • Leyfið barninu að vera með í undirbúningnum. Útbúið t.d. gott nesti til að hafa með og borðið úti í náttúrunni.
  • Ekki fara of geyst í byrjun. Hafið gönguna ekki of langa né of erfiða. Látið barnið ráða hraðanum og sýnið þolinmæði. Með reglulegri hreyfingu byggir barnið upp þol. Þannig að eftir því sem barnið hreyfir sig meira því meiri þoluppbygging á sér stað.
  • Verið ekki spör á hrósið og munið að vera hvetjandi.
  • Mikilvægt er að þau séu í góðum skóm og þægilegum fötum, vel varin fyrir sól og / eða regni.
  • Leyfið þeim að hafa léttan bakpoka með einhverju spennandi í. En munið að oftast endar þetta með því að þið fullorðna fólkið þurfið að bera pokann.
  • Veljið leið sem vekur áhuga þeirra. Börn hafa yfirleitt gaman af að klifra , hoppa yfir, vaða, skoða dýralífið, safna prikum, könglum, laufum, skeljum o.s.frv. Þeim leiðist frekar einhæfar leiðir á malbikuðum göngustígum sem bjóða ekki upp á neitt af áðurnefndu.
  • Gott er einnig að hafa kort af leiðinni og leyfa þeim að fylgjast með á kortinu.
  • Tilvalið er að leyfa vinum að slást með í för svona endrum og sinnum. Svo er líka möguleiki að fylgjast með auglýsingum um skipulagðar fjölskyldugöngur og slást í hópinn.
  • Ekki pína börnin áfram ef þau vilja ekki taka þátt, það gæti latt þau frekar en hvatt.
  • Verið ekki undrandi ef áhugasamt barn hættir allt í einu að hafa áhuga á þessari afþreyingu þegar unglingsárunum er náð. Miklar líkur eru á að þetta sé bara tímabundið ástand og að einstaklingurinn muni taka upp fyrri áhugamál þegar ákveðnu aldursskeiði er náð því lengi býr að fyrstu gerð!!!!!

Share |
IsafoldLOGOFjallakofinn